ავტორი: მაგდა ელისაშვილი, საერთაშორისო აუდიტორული და ბიზნესსაკონსულტაციო კომპანია გრანთ თორნთონის ბიზნეს პროცესების გადაწყვეტილებების (BPS) დეპარტამენტის დირექტორი

ბიზნესის განვითარების ნებისმიერ ეტაპზე რესურსების ეფექტიანად მართვა და ხარჯების ოპტიმიზაცია წარმატების მიღწევის ერთ-ერთ უმთავრეს გასაღებს წარმოადგენს. სწორი და რაციონალური სტრატეგიების შერჩევით, საწარმოებს შეუძლიათ თავიანთი ოპერაციების ოპტიმიზაცია, ფინანსური მაჩვენებლების გაუმჯობესება და შედეგად, კონკურენტუნარიანობის ზრდა.

ხარჯების მართვის პროცესში უმნიშვნელოვანეს როლს ასრულებს სწორი ფინანსური და საგადასახადო აღრიცხვა, ვინაიდან მმართველი რგოლი იღებს ზუსტ და დროულ ინფორმაციას კომპანიის ფინანსური შედეგებისა და საგადასახადო ვალდებულებების შესახებ. სათანადო ფინანსური და საგადასახადო აღრიცხვის პრაქტიკა დაგეხმარებათ, მართოთ და შეამციროთ ხარჯები რამდენიმე გზით:

ხარჯების მუდმივი მონიტორინგი და კონტროლი

ზუსტი ფინანსური აღრიცხვა უზრუნველყოფს ხარჯების ეფექტიან კატეგორიზაციას, რაც ორგანიზაციებს საშუალებას აძლევს, განსაზღვრონ ის მიმართულებები, რომლებისთვისაც გაწეული ხარჯები საჭიროზე მეტია და მიიღონ შესაბამისი ზომები.

პროგნოზირება და ბიუჯეტის შედგენა

სწორად აღრიცხული ისტორიული ფინანსური მონაცემებით, საწარმოებს შეუძლიათ შექმნან რეალისტური ბიუჯეტი, რაც მათ დაეხმარებათ დაისახონ მიზნები, გაანაწილონ რესურსები ეფექტიანად და გამოავლინონ ხარჯების დაზოგვის პოტენციური შესაძლებლობები.

საგადასახადო დაგეგმვა და შესაბამისობა

სათანადო საგადასახადო აღრიცხვა უზრუნველყოფს საგადასახადო რეგულაციებთან შესაბამისობას ვალდებულებების ოპტიმიზაციის პარალელურად. ბიზნესს, რომელიც მაქსიმალურად ინფორმირებულია საგადასახადო კანონებისა და რეგულაციების შესახებ, შეუძლია განსაზღვროს სამართლებრივი სტრატეგიები საგადასახადო ტვირთის შესამცირებლად და ისარგებლოს არსებული საგადასახადო შეღავათებით.

ფულადი ნაკადების მართვა

ეფექტიანი ფინანსური აღრიცხვა ეხმარება ორგანიზაციებს, მართონ ფულადი ნაკადები შემოსავლების მიღებისა და ხარჯების დაფარვის დროის შესახებ ინფორმაციის მიწოდებით. ეს ინფორმაცია მნიშვნელოვანია ფულადი სახსრების დეფიციტის თავიდან აცილებისა და სამუშაო კაპიტალის გამოყენების ოპტიმიზაციისთვის.

ხარჯების განაწილება და პროდუქტის მომგებიანობა

ხარჯების ზუსტი განაწილება აუცილებელია საქონლის ან მომსახურების წარმოების რეალური ღირებულების დასადგენად. სათანადო ფინანსური აღრიცხვის პრაქტიკა ხელს უწყობს ხარჯების განაწილებას კონკრეტულ პროდუქტებზე ან სერვისებზე, რაც საშუალებას აძლევს ბიზნესს დაადგინოს ყველაზე და ნაკლებად მომგებიანი მიმართულებები. აღნიშნული კი განაპირობებს ინფორმირებული გადაწყვეტილებების მიღებას და რელევანტურ საფასო სტრატეგიას.

რისკების მართვა და საგანგებო დაგეგმვა

სათანადოფინანსური აღრიცხვა რისკებისა და გაურკვევლობების შეფასების საშუალებას გვაძლევს. ორგანიზაციებს შეუძლიათ გამოიყენონ ეს ინფორმაცია საგანგებო გეგმების შესამუშავებლად და რეზერვების შესაქმნელად პოტენციური სამომავლო ხარჯებისთვის. ფინანსური რისკების გააზრება საშუალებას აძლევს ბიზნესს, იყოს უკეთ მომზადებული და შეამციროს გაუთვალისწინებელი მოვლენების გავლენა ხარჯების ოდენობაზე.

ტექნოლოგიების ინტეგრაცია

პროგრამული უზრუნველყოფისა და ტექნოლოგიის გამოყენება აუმჯობესებს სააღრიცხვო პროცესებს, ამცირებს შეცდომებს და ზრდის ფინანსური მართვის ეფექტიანობას. ტექნიკურად გამართულ სისტემებს შეუძლიათ უზრუნველყონ რეალურ დროში მონაცემების გენერირება, რაც საშუალებას აძლევს ბიზნესს, მიიღოს უფრო სწრაფი და რაციონალური გადაწყვეტილებები.

თამამად შეიძლება ითქვას, რომ ჯანსაღი სააღრიცხვო პრაქტიკის დაცვით, ბიზნესს შეუძლია გააძლიეროს ხარჯების მართვის უნარი და მიიღოს ინფორმირებული სტრატეგიული გადაწყვეტილებები, რაც ხელს შეუწყობს კომპანიის მიერ დასახული საერთო მიზნების მიღწევას.

თუ თქვენი ბიზნესისთვის სწორედ ზემოთ აღნიშნული სერვისებით სარგებლობა გესაჭიროებათ, ამაში საერთაშორისო აუდიტორული და ბიზნესსაკონსულტაციო კომპანია გრანთ თორნთონი დაგეხმარებათ, რომლის მომსახურებაზეც საქართველოს ბანკი 40%-იან ფასდაკლებას გთავაზობთ.